မန္တလေးမှာ ရခိုင်ဆိုင်တွေကို အားမပေးဖို့နဲ့ ရခိုင်ဆိုင်မှန်သမျှ မြို့ကထွက်သွားဖို့ စာလိုက်ကပ်

မန္တလေးမြို့က ဓာတ်တိုင်တွေ၊ လမ်းလယ်ခေါင်နေရာတွေနဲ့ ဖြတ်သန်းသွားလာသူ များပြားတဲ့နေရာတွေမှာ ရခိုင်ဆိုင်တွေကို အားမပေးဖို့နဲ့ ရခိုင်ဆိုင်မှန်သမျှ မြို့ကနေ ထွက်သွားဖို့ စာလိုက်ကပ်နေကြောင်း သိရှိရပါတယ်။

မန္တလေးမှာနေထိုင်သူတွေ အပါအဝင် မန္တလေးမြို့ကိုရောက်လာတဲ့ပြည်သူတွေအနေနဲ့ ရခိုင်စားသောက်ဆိုင်တွေကို သွားရောက်အားမပေးဖို့၊ ရခိုင်တွေရောင်းချတဲ့အရောင်းဆိုင်တွေမှာ မဝယ်ယူဖို့ သတိပေးတားမြစ်ပါတယ်ဆိုပြီး စာတွေလိုက်ကပ်ထားတာဖြစ်တယ်လို့ ဆိုပါတယ်။

ရခိုင်ဆိုင်တွေမှန်သမျှ မန္တလေးမြို့ပေါ်ကနေ ထွက်သွားဆိုတဲ့စာတွေကိုလည်း နေရာတိုင်းမှာ လိုက်ကပ်နေပြီး ဒီလိုလိုက်ကပ်နေတဲ့စာတွေကြောင့် မလိုလားအပ်တဲ့သွေးကွဲမှုတွေ၊ အမုန်းပွားမှုတွေဖြစ်လာမှာကို မြို့နေပြည်သူလူထုက စိုးရိမ်နေကြပါတယ်။

ရခိုင်ဆိုင်တွေမှာ သွားရောက်ဝယ်ယူတာတွေ မလုပ်ဖို့၊ ရခိုင်ဆိုင်တွေကို အားမပေးဖို့ လှုံ့ဆော်မှုတွေ အခုရက်ပိုင်းအတွင်း အွန်လိုင်းမှာ ပျံ့နှံ့လာပြီး လက်ရှိမှာတော့ မန္တလေးမြို့မှာ စာတွေကပ်တဲ့အထိ ဖြစ်လာခဲ့ပြီပဲဖြစ်ပါတယ်။