အမှတ်တရဖြစ်စေခဲ့တဲ့နေရာက အမှတ်တရဖြစ်စရာနိုင်ပွဲနဲ့ နွေးထွေးစွာ ကြိုဆိုခဲ့လို့ ဗန်ပါစီ ကျေးဇူးတင်စကားပြော

အာဆင်နယ်နဲ့ မန်ယူတို့ရဲ့တိုက်စစ်မှူးဟောင်းဖြစ်ပြီး မန်ယူနဲ့အတူ ပရီးမီးယားလိဂ်အမှတ်ပေးချန်ပီယံဆုကိုရရှိခဲ့တဲ့ ဗန်ပါစီဟာ ဘောက်ဆင်းဒေးမှာ မန်ယူက အက်စတွန်ဗီလာကို နောက်ကနေလိုက်ပြီး အနိုင်ယူခဲ့တဲ့ပွဲကို လာရောက်ကြည့်ရှုအားပေးခဲ့ပြီး ကျေးဇူးတင်စကားလည်း ပြောသွားခဲ့ပါတယ်။

ဗန်ပါစီအတွက် အက်စတွန်ဗီလာဟာ အမှတ်တရဖြစ်စရာအသင်းတစ်သင်းဖြစ်ပြီး မန်ယူနဲ့အတူ အမှတ်ပေးချန်ပီယံဖြစ်ဖို့ ဗန်ပါစီ သေချာခဲ့တဲ့ပွဲဟာ အက်စတွန်ဗီလာကို အနိုင်ရခဲ့တဲ့ပွဲပဲဖြစ်ပါတယ်။

အဲ့ဒီပွဲမှာ မန်ယူက အက်စတွန်ဗီလာကို ၄ ဂိုး ၂ ဂိုးနဲ့ အနိုင်ရခဲ့ပြီး မန်ယူ အနိုင်သေချာစေမယ့်ပွဲသိမ်းဂိုးကို အံ့အားသင့်စရာကန်ချက်နဲ့ ဗန်ပါစီက သွင်းယူပေးခဲ့တဲ့အမှတ်တရရှိပါတယ်။

ဗန်ပါစီ ဟာ ရူနီပေးပို့လိုက်တဲ့ဘောလုံးကို ၁၈ ကိုက်စည်းထိပ်ကနေ မြေမကျကန်ချက်နဲ့ လှလှပပကန်သွင်းကာ အက်စတွန်ဗီလာဂိုးသမားကို ငုတ်တုပ်မေ့သွားစေခဲ့ပြီး အဲ့ဒီဘောလုံးရာသီအတွက် အဲ့ဒီနိုင်ပွဲအပြီးမှာ မန်ယူက အမှတ်ပေးချန်ပီယံဖြစ်ဖို့ သေချာသွားခဲ့တာပဲဖြစ်ပါတယ်။

မနေ့ကပွဲမှာဆိုရင်လည်း မန်ယူဟာ ပထမပိုင်းအပြီး ၂ ဂိုးပြတ်ရှုံးနေခဲ့တာကို ဒုတိယပိုင်းမှာ ၃ ဂိုးပြန်သွင်းပြီး နောက်ကနေ လိုက်ကစားကာ ၃ ဂိုး ၂ ဂိုးဆိုတဲ့ရလဒ်နဲ့အတူ အက်စတွန်ဗီလာကို အနိုင်ယူပြခဲ့တာဖြစ်ပါတယ်။

ဗန်ပါစီက အိုးလ်ထရက်ဒ်ဖို့ဒ်ဆီ တစ်ခါတစ်ခေါက် ပြန်ရောက်လာတာနဲ့ မန်ယူရဲ့မနေ့က နိုင်ပွဲနဲ့ပတ်သက်လို့ အမှတ်တရဖြစ်စေခဲ့တဲ့နေရာက အမှတ်တရဖြစ်စရာနိုင်ပွဲနဲ့ နွေးထွေးစွာ ကြိုဆိုခဲ့လို့ ကျေးဇူးတင်ရှိရပါကြောင်း ရေးသားဖော်ပြသွားခဲ့ပါတယ်။