အင်းစိန်ထောင်ရှေ့မှာ ဗုံးပေါက်ကွဲလို့ စစ်ဆေးရေး တင်းတင်းကျပ်ကျပ် လုပ်ဆောင်နေတယ်လို့ ဆို

ရန်ကုန်တိုင်း၊ အင်းစိန်မြို့နယ်၊ အင်းစိန်ထောင်ရှေ့မှာ ဒီနေ့ နေ့လယ်ပိုင်းက ဗုံးပေါက်ကွဲမှု ဖြစ်ပွားခဲ့လို့ လတ်တလောမှာ စစ်ဆေးရေးတွေ တင်းတင်းကျပ်ကျပ် လုပ်ဆောင်နေပြီလို့ သိရပါတယ်။

အကျဉ်းထောင်နဲ့မျက်နှာချင်းဆိုင်မှာရှိတဲ့ CB ဘဏ်အနားမှာ ပေါက်ကွဲမှုဖြစ်ပွားခဲ့ပြီး ပေါက်ကွဲအားက ပြင်းထန်တယ်လို့ လတ်တလောမှာ သတင်းကြားသိရပါတယ်။

ပေါက်ကွဲမှုဖြစ်ပွားပြီးတဲ့နောက် အင်းစိန်ထောင်အနီးအဝိုက်နဲ့ အင်းစိန်ပေါက်တောဝလမ်းကို ပိတ်ဆို့ပြီး စစ်ဆေးတာတွေ လုပ်နေတယ်လို့ ဆိုပါတယ်။

လက်ရှိမှာ အဲ့ဒီပတ်ဝန်းကျင်တဝိုက် လမ်းသွားလမ်းလာ နည်းပါးသွားခဲ့ပြီဖြစ်သလို ဆိုင်ခန်းတချို့လည်း စောစောစီးစီး ပိတ်သိမ်းသွားကြပြီလို့ သိရှိရပါတယ်။

ပေါက်ကွဲမှုဟာ နေ့လယ် ၁ နာရီဝန်းကျင်လောက်က ဖြစ်ပွားခဲ့တာဖြစ်ပြီး ညနေ ၃ နာရီခွဲအချိန်လောက်အထိ အဲ့ဒီတဝိုက်မှာ စစ်ဆေးမှုတွေ ဆောင်ရွက်နေတယ်လို့ သတင်းကြားသိရပါတယ်။