သခင်ကြီးငွေပုလေသံနဲ့ ပြောရရင် မန်ယူအတွက် စိတ်….စိတ်….စိတ်တောင် မကောင်းဘူး

ဒီတစ်ပတ် ပရီးမီးယားလိဂ် ပွဲစဉ် ၁၇ မှာ လီဗာပူးနဲ့ မန်ယူတို့ ထိပ်တိုက်ဆုံနေပါတယ်။ လီဗာပူးအသင်းပိုင် အန်ဖီးလ်ဘောလုံးကွင်းကြီးဆီကို သွားရောက်ပြီး မန်ယူက ဒီပွဲကို ကစားရမှာပါ။ ဖိအားတွေအောက်ကို ရောက်နေတဲ့ မန်ယူအတွက် ဒီပွဲမှာလည်း ကံဆိုးမ သွားလေရာ မိုးလိုက်ရွာနေတဲ့အချက်တွေရှိလို့နေပါတယ်။

မန်ယူဟာ လီဗာပူးကို ရင်ဆိုင်ဖို့အတွက် အန်ဖီးလ်ကွင်းကြီးဆီကို နောက်ဆုံး ၁၀ ကြိမ် လာခဲ့တာမှာ သွင်းဂိုးဆိုလို့ ၂ ဂိုးပဲ ရခဲ့ဖူးပါတယ်။ လီဗာပူးက အဲ့ဒီ ၁၀ ပွဲမှာ မန်ယူဘက်ကို ၃၆ ဂိုးအထိ သွင်းခဲ့တာပါ။

ပိုပြီးဆိုးဖို့ရှိတာက ဒီပွဲကို တာဝန်ယူမယ့် ဒိုင်လူကြီးက မိုက်ကယ် အိုလီဗာ ဖြစ်နေတဲ့အချက်ပါပဲ။ မိုက်ကယ် အိုလီဗာ ဟာ မန်ယူရဲ့ပွဲစဉ်တွေကို တာဝန်ယူခွင့်ရရှိချိန်မှာ ပြိုင်ဘက် ၃ သင်းကို ပင်နယ်တီချီးမြှင့်ခဲ့ဖူးပါတယ်။

၂၀၁၇-၁၈ ဘောလုံးရာသီနောက်ပိုင်းမှာ အန်ဖီးလ်ကွင်းကြီးထဲ မန်ယူသွင်းနိုင်တဲ့ဂိုးက တစ်ဂိုးတည်းသာ ရှိပါတော့တယ်။ အချက်အလက်တွေကတော့ ဒီပွဲရဲ့ဖြစ်နိုင်ခြေ လာရာနဲ့ လားရာကို ညွှန်ပြနေသလိုပါပဲ။ သခင်ကြီး ငွေပုရဲ့လေသံနဲ့ပြောရရင် ဒေတာတွေကတော့ စိတ်…စိတ်…စိတ်တောင် မကောင်းဘူး မန်ယူရေလို့ တီးတိုးပြောသလို ရှိလို့နေပါတယ်။