3 Idiots နဲ့ Munna Bhai M.B.B.S ဇာတ်ကားတွေအတွက် ရှာရွတ်ခန်းကို အရင်ဆုံး ကမ်းလှမ်းခဲ့တာပါ

ဘောလိဝုဒ်ရုပ်ရှင်လောကရဲ့အအောင်မြင်ဆုံးဇာတ်ကားတွေထဲမှာ ပါဝင်တဲ့ 3 Idiots နဲ့ Munna Bhai M.B.B.S ဇာတ်ကားတွေအတွက် သရုပ်ဆောင်ရွေးချယ်ချိန်မှာ ပထမဦးစားပေးအဖြစ် ကမ်းလှမ်းခံခဲ့ရသူက ရှာရွတ်ခန်း ဖြစ်ပါတယ်။

ဒါကို သိပ်မကြာသေးခင်က ပြုလုပ်ခဲ့တဲ့ အင်တာဗျူးတစ်ခုမှာ ရှာရွတ်ခန်းကိုယ်တိုင် ထည့်သွင်းဖြေကြားပေးသွားခဲ့တာပါ။

ဒါရိုက်တာ ရတ်ဂျ်ကူမာရီ ဟီရာနီ က 3 Idiots နဲ့ Munna Bhai M.B.B.S ဇာတ်ကားတွေမှာကတည်းက ရှာရွတ်ခန်းနဲ့ လက်တွဲအလုပ်လုပ်ဖို့ ဆန္ဒရှိနေခဲ့တာပါ။

အဲ့ဒီဇာတ်ကား ၂ ကားလုံးအတွက် လာရောက်ကမ်းလှမ်းတဲ့အချိန်တိုင်းမှာ သူက ဒဏ်ရာတွေနဲ့ရင်ဆိုင်နေရတဲ့ကာလတွေချည်းဖြစ်နေလို့ ရင်နင့်စွာနဲ့ လက်မခံနိုင်ဖြစ်ခဲ့ရတယ်လို့ 3 Idiots နဲ့ Munna Bhai M.B.B.S ဇာတ်ကားတွေကို သူ မရိုက်ကူးဖြစ်ခဲ့တဲ့အကြောင်း ရှာရွတ်ခန်းက ပြောပြပါတယ်။

ဒါရိုက်တာ ရတ်ဂျ်ကူမာရီ ဟီရာနီနဲ့ ရှာရွတ်ခန်းတို့ဟာ DUNKI ဇာတ်ကားမှာ လက်တွဲအလုပ်လုပ်ခဲ့ကြပြီး လက်ရှိအချိန်မှာတော့ DUNKI ဇာတ်ကားကလည်း ရုပ်ရှင်ရုံတွေမှာ အောင်မြင်မှုတွေ ရရှိနေပြီပဲဖြစ်ပါတယ်။

3 Idiots နဲ့ Munna Bhai M.B.B.S ဇာတ်ကားတွေမှာ ဒါရိုက်တာ ရတ်ဂျ်ကူမာရီ ဟီရာနီနဲ့ ရှာရွတ်ခန်းတို့ စောစောစီးစီး လက်တွဲအလုပ်လုပ်ဖြစ်ခဲ့ရင် အဲ့ဒီဇာတ်ကား ၂ ကားလုံးက အခုထက်ပိုပြီး ဝင်ငွေအရရော၊ ကျော်ကြားမှုအရပါ အောင်မြင်မှု ပိုကြီးနိုင်တယ်လို့ မှတ်ချက်ပေးတာတွေလည်း ရှိနေပါတယ်။