အသင်းအတွက် တန်းဟတ်ဂ်က ပြဿနာကြီးဖြစ်နေပြီလို့ မန်ယူပရိသတ်တွေ ဝေဖန်

မန်ချက်စတာ၊ ဒီဇင်ဘာ ၂၄

မန်ယူပရိသတ်တွေဟာ နည်းပြ အီရစ်ခ်တန်းဟတ်ဂ်က အသင်းအတွက် တကယ့်ကို ဒုက္ခပေးတဲ့ပြဿနာကြီးဖြစ်နေပြီလို့ အတိအလင်း ထုတ်ဖော်ဝေဖန်နေကြပြီပဲဖြစ်ပါတယ်။

ဒါဟာ တစ်နည်းပြောရရင် တန်းဟတ်ဂ်အတွက် ဝဋ်လည်တာပါပဲ။ တန်းဟတ်ဂ်ဟာ အခုလို စကားမျိုးကို သုံးနှုန်းပြီး စီရော်နယ်နယ်ဒိုကို မန်ယူကနေ ထွက်ခွာစေခဲ့ပါတယ်။

ပီးယာ့စ်မော်ဂန်နဲ့ အင်တာဗျူးဖြေကြားချက်တွေ ထွက်ပေါ်လာခဲ့အပြီးမှာ တန်းဟတ်ဂ်က စီရော်နယ်ဒိုဟာ အသင်းအတွက် တကယ့်ကို ပြဿနာကြီးဖြစ်နေပြီလို့ ထုတ်ဖော်ပြောဆိုခဲ့ပြီး အဆုံးသတ်မှာတော့ စီရော်နယ်ဒိုက အယ်လ်နတ်စ်ဆာဆီကို ပြောင်းရွှေ့ရတဲ့အထိ ဖြစ်သွားခဲ့ပါတယ်။

အခုတော့ ဝက်စ်ဟမ်းကနေ မန်ယူကို နှစ်ဂိုး ဂိုးမရှိနဲ့ အနိုင်ယူသွားခဲ့တဲ့ပရီးမီးယားလိဂ်ပွဲစဉ်အပြီးမှာ မန်ယူပရိသတ်တွေက “အီရစ်ခ်တန်းဟတ်ဂ်ဟာ စီရော်နယ်ဒိုကို အသင်းရဲ့ ပြဿနာကြီးလို့ ပြောခဲ့ပါတယ်။ တကယ်က အသင်းရဲ့ ပြဿနာကြီးဟာ စီရော်နယ်ဒို မဟုတ်ပါဘူး။ အသင်းရဲ့ ပြဿနာကြီးက အီရစ်ခ်တန်းဟတ်ဂ်ပါပဲ”လို့ ထုတ်ဖော်ရေးသားနေကြပြီပဲဖြစ်ပါတယ်။