အရည်အချင်းစစ်စာမေးပွဲကို အလွန်ဆို ဂုဏ်ထူးမှတ်နဲ့ အောင်သွားပြီလို့ မီဒီယာတွေ ရေးသား

လေဗာကူဆင်နည်းပြ အလွန်ဆို ဟာ အရည်အချင်းစစ်စာမေးပွဲကို ဂုဏ်ထူးမှတ်နဲ့ အောင်မြင်နေပြီလို့ လေဗာကူဆင်ကနေ ဘိုင်ယန်မြူးနစ်ကို ဂိုးပြတ်အနိုင်ရလိုက်တဲ့ ဘွန်ဒက်စ်လီဂါပွဲစဉ်အပြီးမှာ မီဒီယာတွေက ရေးသားလာခဲ့ကြတယ်။

လေဗာကူဆင်ဟာ ဘိုင်ယန်မြူးနစ်ကို ၃ ဂိုးပြတ် အနိုင်ယူလိုက်တာဖြစ်ပြီး အဲ့ဒီပွဲစဉ်အပြီးမှာ လေဗာကူဆင်က ဘိုင်ယန်မြူးနစ်ကို ရမှတ် ၅ မှတ်အထိ ပြန်ဖြတ်လိုက်နိုင်ပြီဖြစ်ပါတယ်။

အခုဆိုရင် လေဗာကူဆင်က ဂျာမန်ဘွန်ဒက်စ်လီဂါအမှတ်ပေးဇယားကို ထိပ်ဆုံးက ဦးဆောင်နေပြီး ချန်ပီယံဖြစ်ဖို့ ရေပန်းစားမှုနဲ့ အလေးပေးချက်တွေကလည်း ဆက်တိုက်ဆိုသလိုပဲ မြင့်တက်လာနေပြီဖြစ်ပါတယ်။

အလွန်ဆိုကို နည်းပြအဖြစ် ခေါ်ယူဖို့အတွက် လီဗာပူးနဲ့ ချယ်လ်ဆီးတို့က အရမ်းပဲ စိတ်ဝင်စားနေပြီး လီဗာပူးဘက်ကဆိုရင် ကမ်းလှမ်းဆက်သွယ်မှုတချို့တောင် ရှိနေပြီလို့ သိရပါတယ်။

လီဗာပူးနည်းပြ ဂျာဂင်ကလော့ပ်ဟာ လက်ရှိဘောလုံးရာသီပြီးဆုံးရင် အသင်းနဲ့လမ်းခွဲတော့မှာဖြစ်လို့ အဲ့ဒီကွက်လပ်ကို အစားဖြည့်ဖို့အတွက် လီဗာပူးက အလွန်ဆို ကို အလိုရှိနေတာဖြစ်ပါတယ်။