သူ မရှိချိန်မှာလည်း လီဗာပူးက အဆင်ပြေပြေပဲ ဖြတ်သန်းနိုင်လိမ့်မယ်လို့ ယုံကြည်ထားတဲ့ ဆာလားဟ်

လီဗာပူးတိုက်စစ်မှူး ဆာလားဟ် က သူမရှိတဲ့အချိန်မှာလည်း လီဗာပူးက အဆင်ပြေပြေပဲ ရလဒ်ကောင်းတွေနဲ့ ဖြတ်သန်းနိုင်လိမ့်မယ်လို့ ယုံကြည်ထားတဲ့အကြောင်း ထုတ်ဖော်ပြောကြားလိုက်ပါတယ်။

ဆာလားဟ် ဟာ အခုဆိုရင် အီဂျစ်လက်ရွေးစင်အသင်းကို ကိုယ်စားပြုပြီး အာဖရိကနိုင်ငံများဖလားပြိုင်ပွဲ ပါဝင်ကစားပေးဖို့အတွက် ပြိုင်ပွဲအိမ်ရှင် အိုင်ဗရီကို့စ်နိုင်ငံဆီကို သွားရောက်နေပြီပဲဖြစ်ပါတယ်။

လီဗာပူးက နယူးကာဆယ်ကို ၄ ဂိုး ၂ ဂိုးနဲ့ အနိုင်ရခဲ့တဲ့ နှစ်သစ်ကူးပရီးမီးယားလိဂ်ပွဲစဉ်မှာ လီဗာပူးအတွက် ဆာလားဟ်က ပါဝင်ကစားပေးခဲ့ပြီး သွင်းဂိုးလည်း ၂ ဂိုး ရယူပေးခဲ့ပါတယ်။

ဆာလားဟ်ဟာ ဒီရာသီမှာ လီဗာပူးအတွက် သွင်းဂိုး ၁၆ ဂိုး ရယူပေးထားပြီး ပရီးမီးယားလိဂ်ဂိုးသွင်းအများဆုံး ကစားသမားစာရင်းမှာ ထိပ်ဆုံးက ရှိနေတဲ့အတွက် ဆာလားဟ် မရှိသေးချိန်မှာ လီဗာပူးက တိုက်စစ်ပိုင်းဆိုင်ရာ အခက်အခဲတွေ ကြုံတွေ့ရနိုင်တယ်လို့ သုံးသပ်ချက်တွေလည်း ထွက်ပေါ်နေပါတယ်။

ဆာလားဟ်ကတော့ “ကျွန်တော်တို့မှာ ဟန်ချက်ညီတဲ့စုဖွဲ့မှုနဲ့ ကစားသမားကောင်းတွေ ရှိနေပြီးသားပါ။ အာဖရိကနိုင်ငံများဖလားပွဲ ကျွန်တော် သွားကစားနေချိန်မှာ လီဗာပူးက ဘာမှအခက်ကြုံဖို့ မရှိပါဘူး။ အဆင်ပြေပြေဖြတ်သန်းပြတာကို မြင်ကြရပါလိမ့်မယ်”လို့ မနေ့က ပွဲအပြီးမှာ Sky Sports ကို ဖြေကြားပေးသွားခဲ့ပါတယ်။