သရုပ်ဆောင် အကယ်ဒမီ မေသဉ္ဇာဦး၏သားကြီး ယာဉ်တိုက်မှုဖြင့် ကွယ်လွန်

သရုပ်ဆောင် အကယ်ဒမီ မေသဉ္ဇာဦး၏သားကြီးဖြစ်သူ ကိုမင်းသန်းကျော်ဟာ ခရစ္စမတ်နေ့ ည ၁၀ နာရီခွဲအချိန်လောက်က ယာဉ်တိုက်မှုနဲ့ ကွယ်လွန်သွားခဲ့တယ်လို့ သိရှိရပါတယ်။

အသက် ၂၇ နှစ်အရွယ် ကိုမင်းသန်းကျော်ဟာ ဒီဇင်ဘာလ ၂၅ ရက် ည ၁၀ နာရီခွဲအချိန်လောက်က လမ်းလယ်ဓာတ်တိုင်ကို ဝင်တိုက်မိခဲ့ပြီး ကွယ်လွန်သွားခဲ့တာဖြစ်တယ်လို့ သတင်းကြားသိရပါတယ်။

ရန်ကုန်တိုင်းဒေသကြီး၊ တာမွေမြို့နယ်၊ ဗညားဒလလမ်းမှာ အခုယာဉ်တိုက်မှုဖြစ်ပွားခဲ့ပြီး ကိုမင်းကျော်သန်း မောင်းနှင်လာတဲ့ကားက MDY 15 9R/3105 KIA Carnvial ဖြစ်တယ်လို့ ဆိုပါတယ်။

ရှင်ပါကူဆေးခန်းဘက်ကနေ ကျောက်မြောင်းမီးပွိုင့်ဖက်ဆီကို မောင်းနှင်လာခဲ့တဲ့ MDY 15 9R/3105 KIA Carnvial ကားဟာ ကျောက်မြောင်းမီးသတ်အရှေ့မှာ အရှိန်မထိန်းနိုင်ဘဲ လမ်းလယ်ဓါတ်တိုင်ကို ဝင်တိုက်မိခဲ့တာလို့ သိရပါတယ်။

ယာဉ်မောင်း ကိုမင်းသန်းကျော် ဟာ ဦးခေါင်းနောက်စေ့စုတ်ပြဲဒဏ်ရာတွေရရှိပြီး ရန်ကုန်ဆေးရုံကြီးဆီ ပို့ဆောင်ကုသစဉ်မှာ ကွယ်လွန်သွားခဲ့တယ်လို့ သတင်းကြားသိရပါတယ်။