ရှာရွတ်ခန်းလို သရုပ်ဆောင်ကြယ်ပွင့်နဲ့ဆုံခဲ့ရတာက အရမ်းကို ကျေနပ်စရာကောင်းတယ်လို့ ဖီဖာဥက္ကဌ ပြော

ဖီဖာဥက္ကဌ အင်ဖန်တီနိုက အာရှဖလားဗိုလ်လုပွဲစဉ်ကို တက်ရောက်ကြည့်ရှုဖို့အတွက် လာရောက်တဲ့အချိန်မှာ ရှာရွတ်ခန်းလို ကမ္ဘာလုံးဆိုင်ရာ သရုပ်ဆောင်ကြယ်ပွင့်နဲ့ ဆုံခွင့်ရရှိတာက အရမ်းကိုပဲ ကျေနပ်စရာကောင်းလှတယ်လို့ ထုတ်ဖော်ပြောကြားလိုက်ပါတယ်။

ကာတာက ဂျော်ဒန်ကို ၃ ဂိုး ၁ ဂိုးနဲ့ အနိုင်ယူသွားခဲ့တဲ့ အာရှဖလားဗိုလ်လုပွဲစဉ်ကို ကြည့်ရှုဖို့အတွက် ကာတာနိုင်ငံဆီကို ရောက်လာခဲ့စဉ်အခိုက်မှာ ဘောလိဝုဒ်စူပါစတား ရှာရွတ်ခန်းနဲ့ ဖီဖာဥက္ကဌ အင်ဖန်တီနိုတို့က ဖက်လှဲတကင်း ဆုံတွေ့ခဲ့ကြတာပဲဖြစ်ပါတယ်။

“အာရှဖလားဗိုလ်လုပွဲကျင်းပတဲ့ ဒိုဟာမြို့မှာ ရှာရွတ်ခန်းလို ကမ္ဘာလုံးဆိုင်ရာ သရုပ်ဆောင်ကြယ်တစ်ပွင့်နဲ့ ဆုံတွေ့ခွင့်ရတာက တကယ်ကို ကြီးကျယ်လှတဲ့ ကျေနပ်စရာတစ်ခုပါပဲ။ ကျွန်တော်တို့ရဲ့လှပတဲ့ဘောလုံးအားကစားကို ရှာရွတ်ခန်းလိုပုဂ္ဂိုလ်များက စိတ်ဝင်တစားရှိနေတာလည်း ဝမ်းသာရပါတယ်။ ရှေ့လာမယ့်လုပ်ငန်းတွေမှာ ကံကောင်းပါစေလို့လည်း ဆုတောင်းပေးပါတယ်။ သိပ်မကြာခင်ကာလအတွင်း ဖီဖာရဲ့အခမ်းအနားတစ်ခုခုမှာ ကျွန်တော်နဲ့ ရှာရွတ်ခန်းတို့ ပြန်ဆုံခွင့်ရနိုင်ဖို့ကိုလည်း မျှော်လင့်ပါတယ်”လို့ အင်ဖန်တီနိုက ပြောသွားခဲ့ပါတယ်။