ရန်ကုန်နှင့်ဒေသ(၇)ခု၌ နေ့အပူချိန် ၄၀°Cအထက်အထိ မြင့်တက်လာနိုင်၍ အပူမလျှပ်အောင် သတိထားရန်လို

—————————————–

၂၀၂၅ခုနှစ်၊မတ်လ၊(၄)ရက်

ရန်ကုန်တိုင်းနဲ့ဒေသ(၇)ခုမှာ နေ့အပူချိန် တွေ ၄၀°C အထက်အထိ မြင့်တက်လာနိုင်တယ်လို့ မိုးလေဝသပညာရှင်ဦးဝင်းနိုင်ရဲ့ ခန့်မှန်းချက် အရ သိရပါတယ်။

METEOBLUE ကြိုတင်ခန့်မှန်း model များမှ အချက်အလက်‌တွေအရ မတ်လ ပထမ ၁၀ ရက်အတွင်း မကွေးတိုင်း၊ နေပြည်တော်၊ ပဲခူးတိုင်း၊ ဧရာဝတီတိုင်း၊ ရန်ကုန်တိုင်း၊ ကရင်ပြည်နယ်၊ မွန်ပြည်နယ်နှင့် တနင်္သာရီတိုင်းတို့မှာ နေ့အပူချိန်များ ၄၀°C အထက်အထိ မြင့်တက်လာနိုင်ကြောင်း ပြနေတာကို တွေ့ရတယ်လို့ ဆိုပါတယ်။

လာနီညာကြောင့်အပူချိန်မြင့်တက်မှုတွေ ၂၀၂၄ ခုနှစ်(အယ်လိနီညိုနှစ်)ထက် လျော့နည်းသော်လည်း၊ မတ်လအတွင်း စိုထိုင်းဆမြင့်တက်နေသောဒေသ တွေမှာ ခံစားရတဲ့အပူချိန် (Temperature Felt) ၄၀°C အထက်အထိ မြင့်တက်နေနိုင်မယ်လို့ခန့်မှန်းထားပါတယ်။

ဒီအခြေအနေတွေကြောင့် နေ့လည်နေ့ခင်းအချိန် တွေမှာနေရောင်ခြည်တိုက်ရိုက်ထိတွေ့တဲ့နေရာ တွေမှာအလုပ်လုပ်ကြရသူများ၊ သက်ကြီးရွယ်အိုနှင့် ကလေးငယ်များ ရေဓါတ်ဆုံးရှုံးမှုများပြီး အပူလျှပ်ခြင်း(Heat-stroke) ကို ခံစားရနိုင်သောကြောင့် သတိပြုဆင်ခြင်နိုင်ကြဖို့ မိုးလေဝသပညာရှင်ဦးဝင်းနိုင်သတိပေးထားတယ်လို့ သိရပါတယ်။

#Mercury#mercurynews#ပြည်တွင်းသတင်း#နေ့အပူချိန်#ကျန်းမာရေး#မိုးလေဝသ