မြန်မာနိုင်ငံတွင်ခရမ်းလွန်ရောင်ခြည်ကျရောက်မှု လိမ္မော်ရောင်အဆင့်အထိရှိလာ

———————————————————————–

၂၀၂၅ခုနှစ်၊မတ်လ၊(၁၇)ရက်

အခုနှစ်မတ်လမှာ အရင်နှစ်မတ်လထက်ပိုပူတယ်လို့ ခံစားနေရတာဟာ ခရမ်းလွန် ရောင်ခြည် ကျရောက်မှုမြင့်မားတဲ့အတွက်ကြောင့်ဖြစ်တယ်လို့ ပြန်ကြားရေးဝန်ကြီးဌာနမှထုတ်ပြန်တဲ့ အပူဒဏ်အန္တရာယ်သတိပေး ချက်မှာ ဖော်ပြထားတယ်။

အခုမတ်လ ဒုတိယပတ်မှာ ခရမ်းလွန်ရောင်ခြည်ပါဝင်မှု အညွှန်းကိန်းမှာ အမြင့်ဆုံးအနီရောင် အဆင့်သို့ရောက်ခါနီးပြီဖြစ်ပြီးလတ်တလောမှာဒုတိယအမြင့်ဆုံး ခရမ်းလွန်ရောင်ခြည်ပါဝင်မှု အညွှန်းကိန်း ၆ မှ ၇ ပြည့်တဲ့ လိမ္မော်ရောင်အဆင့် ခရမ်းလွန်ရောင်ခြည်အညွှန်းကိန်းမြင့်မားလာတဲ့ အခြေအနေဖြစ်တယ်လို့ ဆိုပါတယ်။

အခုကာလဟာ ခရမ်းလွန်ရောင်ခြည် မြင့်မားလာသောအချိန်အခါဖြစ်ပြီး ခရမ်းလွန်ရောင် ခြည်အညွှန်းကိန်း မြင့်မားစွာရှိနေသောအချိန်တွေမှာ နေရောင်ခြည်နဲ့ထိတွေ့မှုကြောင့် အရေပြားတွေနေလောင်ခြင်း၊ အသားအရောင်တွေ ညိုမည်းလာခြင်းများဖြစ်လာနိုင်တယ်လို့ သတိပေးထားပါတယ်။

ဒီ့အပြင် နေရောင်ခြည်နှင့် ထိတွေ့မှုများလာသောအခါ အရေပြားများ အရွယ်မတိုင်မီပျက်စီးပြီး အိုမင်းရင့်ရော်မှုမြန်ဆန်ခြင်း၊ ခုခံအားများကျဆင်းလာခြင်း၊ မျက်စိတိမ်စွဲခြင်း၊ အရေပြား ကင်ဆာရောဂါများဖြစ်ပွားခြင်း စသည့်ကျန်းမာရေးဆိုးကျိုးများကို ဖြစ်ပေါ်စေနိုင်လို့ နေ့အပူချိန်မြင့်မားတဲ့ နေ့လယ်ခင်းအချိန်တွေမှာ နေရောင်တိုက်ရိုက်ကျရောက်တဲ့နေရာတွေကို မထွက်ကြဖို့၊နေရောင်ထဲမှာအလုပ်မလုပ်ကြဖို့သတိပေးထားပြီး ပြည်သူ့ကျန်းမာရေးဦးစီးဌာနက လမ်းညွှန်ထားတဲ့အပူဒဏ်ကာကွယ်ရေးကို အထူးလိုက်နာဆောင်ရွက်ကြဖို့လိုအပ်တယ် လို့သိရပါတယ်။

ဓါတ်ပုံ-tthl

#mercury#mercurynews#ပြည်တွင်းသတင်း#ခရမ်းလွန်ရောင်ခြည်