မလေးရှားဖိုက်တာကို ရှုံးကြွေးမဆပ်နိုင်ဘဲ ထွန်းမင်းနိုင်(ခ)ဆူလေမန် နောက်တစ်ကြိမ် ရှုံးနိမ့်ပြန်

ဒီနေ့(ဇန်နဝါရီလ ၁၉ ရက်)မှာ ကျင်းပခဲ့တဲ့ One Lumpinee 48 One Fight ပြိုင်ပွဲမှာ မြန်မာလက်ဝှေ့သမား ထွန်းမင်းနိုင်(ခ)ဆူလေမန်နဲ့ မလေးရှားလက်ဝှေ့သမား ကာဘီဘန် ဂျီလီဗန်တို့ စိတ်မကျေပွဲ ယှဉ်ပြိုင်ခဲ့ကြပြီး အခုပွဲစဉ်မှာလည်း မလေးရှားဖိုက်တာကပဲ အမှတ်နဲ့ အနိုင်ယူသွားခဲ့တယ်လို့ သိရပါတယ်။

မြန်မာ့ရိုးရာလက်ဝှေ့ ချန်ပီယံဟောင်း ထွန်းထွန်းမင်းရဲ့ညီဖြစ်တဲ့ ထွန်းမင်းနိုင်(ခ)ဆူလေမန်နဲ့ မလေးရှားလက်ဝှေ့သမား ကာဘီလန် ဂျီလီဗန်တို့ရဲ့ပွဲစဉ်ဟာ ပွဲချီ ၃ ချီပြည့်တဲ့အထိ တစ်ယောက်ကို တစ်ယောက်က အလဲထိုးနိုင်ခြင်း မရှိခဲ့လို့ အမှတ်ပေးဒိုင်လူကြီးတွေရဲ့အဆုံးအဖြတ်ကို ခံယူလိုက်ကြရပါတယ်။

အမှတ်ပေးဒိုင်လူကြီးတွေရဲ့အဆုံးအဖြတ် ထွက်ပေါ်လာချိန်မှာ မလေးရှားဖိုက်တာ ကာဘီလန် ဂျီလီဗန်ကပဲ ထွန်းမင်းနိုင်(ခ)ဆူလေမန်ကို နောက်တစ်ကြိမ် ထပ်နိုင်သွားခဲ့ပြန်ပါတယ်။

ထွန်းမင်းနိုင်(ခ)ဆူလေမန် ဟာ One Championship မှာ One Fight ပွဲစဉ် ၅ ပွဲ ယှဉ်ပြိုင်ခဲ့ပြီးပြီဖြစ်ပါတယ်။ အဲ့ဒီပွဲစဉ် ၅ ပွဲမှာ ထွန်းမင်းနိုင်(ခ)ဆူလေမန်က ၃ ပွဲနိုင်ပြီး ၂ ပွဲ ရှုံးနိမ့်ထားပါတယ်။

ထွန်းမင်းနိုင်(ခ)ဆူလေမန် ရှုံးနိမ့်ခဲ့တဲ့ ၂ ပွဲလုံးဟာ မလေးရှားဖိုက်တာ ကာဘီလန် ဂျီလီဗန်ကိုချည်း အရေးနိမ့်ခဲ့ရတာဖြစ်ပါတယ်။