ဗုံတီးမယ်’ သီချင်း ဖန်တီးထုတ်လွှင့်သူ၊ စီစဉ်သူ၊ ပါဝင်သူများကိုအမှုဖွင့်အရေးယူမည်ဟုထုတ်ပြန်

————————–

၂၀၂၅ခုနှစ်၊မတ်လ၊(၁၉)ရက်

မြန်မာ့တူရိယာဗုံနှင့်ပတ်မများကို ပြက်ရယ်ပြု စော်ကားနေပြီး အဓိပ္ပာယ်နှစ်ခွသီချင်းစာသားများဖြင့် ဖန်တီးထားတဲ့ ‘ဗုံတီးမယ်’သီချင်းဖန်တီးသူကိုအမှုဖွင့်အရေးယူနိုင်ရေးဆောင်ရွက်နေတယ်လို့ ပြန်ကြားရေးဝန်ကြီးဌာနမှ သိရပါတယ်။

အဲဒီ့ ‘ဗုံတီးမယ်’သီချင်းဖန်တီးသူ တေးရေး/ တေးဆို “အောင်ပါစေ”သည် ဆက်သွယ်ရေး ကွန်ရက်ကိုအသုံးပြုပြီး ရုပ်ရှင်ကားထုတ်လွှင့်ပြသခြင်းလုပ်ငန်း လုပ်ကိုင်ခွင့်မှတ်ပုံတင်လက်မှတ်ရယူခြင်းမရှိဘဲ သူရဲ့လူမှုကွန်ရက်အမျိုးမျိုးမှာ တေးသီချင်းဗီဒီယိုများ ထုတ်လွှင့်ပြသလျက်ရှိတယ်လို့ ဆိုပါတယ်။

အဲဒီ့ တေးသီချင်းဗီဒီယိုတွေအနက် “ဗုံတီးမယ်”တေး သီချင်း ဗီဒီယိုဟာ မြန်မာလူမျိုးတို့ရဲ့ အမြတ်တနိုးတန်ဖိုး ထားဂုဏ်ယူရတဲ့ မြန်မာ့တူရိယာဗုံနှင့်ပတ်မများကို ပြက်ရယ်ပြု စော်ကားသဖွယ်ဖြစ်နေသော သရုပ်ပျက်ကပြ ဖျော်ဖြေခြင်းနဲ့ညစ်ညမ်းတဲ့အဓိပ္ပာယ်ပေါက်စေနိုင်သော အဓိပ္ပာယ်နှစ်ခွသီချင်းစာသားများဖြင့် ဖန်တီးထားကြောင်း စိစစ်တွေ့ရှိထားတယ်လို့ ဖော်ပြထားပါတယ်။

ဒါကြောင့်မို့လို့ “ဗုံတီးမယ်” တေးသီချင်းဗီဒီယိုနဲ့ပတ်သက်ပြီး ဖန်တီးထုတ်လွှင့်သူ၊ စီစဉ်သူ၊ ပါဝင်သူတွေကို အမှုဖွင့်အရေးယူနိုင်ရေးစိစစ်လျက်ရှိကြောင်းနဲ့ ဆက်သွယ်ရေးကွန်ရက်ကိုအသုံးပြုပြီးရုပ်ရှင်ကားထုတ်လွှင့်ပြသခြင်းလုပ်ငန်း လုပ်ကိုင်ခွင့်မှတ်ပုံတင်လက်မှတ် ရယူထားခြင်းမရှိသူများအနေဖြင့် လုပ်ကိုင်ခွင့်မှတ်ပုံတင်လက်မှတ်လျှောက်ထားရယူပြီး မိမိတို့လွှင့်တင်မည့် Contentတွေကို စိစစ်ရေးအဖွဲ့ထံ တင်ပြရမှာဖြစ်တယ်လို့ အသိပေးကြေညာထားပါတယ်။

#Mercury#mercurynews#ပြည်တွင်းသတင်း#ဗုံတီးမယ်#ရန်ကုန်#မြန်မာ#သီချင်း