ပြည်တွင်းစစ်ကြောင့် မြန်မာနိုင်ငံသားတွေ ထိုင်းနိုင်ငံထဲကို အုံနဲ့ကျင်းနဲ့ ဝင်လာဖို့ ရှိနေပြီလို့ ဆို

မြန်မာနိုင်ငံထဲမှာ နှစ်ကာလရှည်ဖြစ်ပွားနေတဲ့ ပြည်တွင်းစစ်ကြောင့် မြန်မာနိုင်ငံသားအများအပြားဟာ ထိုင်းနိုင်ငံထဲကို အုံနဲ့ကျင်းနဲ့ ဝင်ရောက်လာဖို့ရှိနေပြီလို့ ထိုင်းနိုင်ငံ လုပ်ငန်းရှင်များရဲ့ ကုန်သည်ကြီးများနဲ့ စက်မှုလက်မှုလုပ်ငန်းရှင်များအသင်း (EconThai) က ပြောကြားလိုက်ပါတယ်။

ပြည်သူ့စစ်မှုထမ်းဥပဒေ အတည်ပြုလိုက်ပြီးနောက် စစ်မှုမထမ်းချင်တဲ့ မြန်မာနိုင်ငံသားအများအပြားဟာ ထိုင်းဘက်ကို နေ့တိုင်းဆိုသလိုပဲ ထွက်ပြေးနေကြပြီး အဲဒီလူငယ်တွေဟာ တရားမဝင်အလုပ်တွေမှာပဲ သောင်တင်နေကြလိမ့်မယ်လို့ ခန့်မှန်းချက်တွေလည်း ထွက်ပေါ်နေပါတယ်။

အဲဒီအခြေအနေတွေဟာ ထိုင်းနိုင်ငံရဲ့လုပ်သားဈေးကွက်ကို လာရောက်ထိခိုက်တော့မှာဖြစ်လို့ ထိုင်းအစိုးရအနေနဲ့ လုပ်ငန်းအခြေအနေတွေ၊ မြန်မာနိုင်ငံသားတွေရဲ့ အလုပ်လျှောက်ထားမှုတွေ၊ လုပ်ငန်းနဲ့ဆက်နွှယ်နေ တဲ့ကိစ္စတွေကို အထူးအလေးထားအာရုံစိုက်ဖို့ လိုအပ်နေပြီဖြစ်ကြောင်း EconThai အဖွဲ့ရဲ့ ဒုတိယဥက္ကဋ္ဌက အသိပေးလိုက်ပါတယ်။

သက်ဆိုင်ရာနိုင်ငံတွေနဲ့ ထိုင်းအစိုးရတို့ လက်မှတ်ရေးထိုးထားတဲ့ နားလည်မှုစာချွန်လွှာ (MoU) အရ အိမ်နီးချင်းနိုင်ငံတွေက နိုင်ငံသားတွေကို ထိုင်းနိုင်ငံထဲမှာ အလုပ်လုပ်ကိုင်ဖိူ့ ခွင့်ပြုချက် ပေးအပ်ထားပါတယ်။

မြန်မာနိုင်ငံသားအလုပ်သမားတွေကို စားသောက်ကုန်ထုတ်လုပ်ရေးလုပ်ငန်း၊ အီလက်ထရောနစ်လုပ်ငန်း၊ ကား အစိတ်အပိုင်းတပ်ဆင်ရေးလုပ်ငန်း၊ တာယာထုတ်လုပ်ရေးလုပ်ငန်း၊ အဝတ်အထည်လုပ်ငန်း၊ အထည်ချုပ်လုပ်ငန်း၊ သကြားထုတ်လုပ်ရေးလုပ်ငန်း၊ ရာဘာလုပ်ငန်းနဲ့ ဆောက်လုပ်ရေးလုပ်ငန်းတွေမှာ အလုပ်ခန့်အပ်လေ့ရှိတယ်လို့လည်း EconThai အဖွဲ့က ပြောပါတယ်။

မြန်မာနိုင်ငံသားအများစုဟာ ဘန်ကောက်၊ ဆမွတ်ဆခုန်ပြည်နယ်၊ ပတ်ထမ်ဌာနီပြည်နယ်နဲ့ နခုန်ပထုမ်ပြည်နယ်တို့မှာ အလုပ်လုပ်ကိုင်လေ့ရှိတယ်လို့ သိရှိရပါတယ်။