ပုဂံမှတူးဖော်ရရှိသည့်ရွှေထည်များကိုတရားမဝင်ရောင်းစားသူများကို အရေးယူ

၂၀၂၄ခုနှစ်၊ဒီဇင်ဘာလ၊(၂၆)ရက်

ပုဂံရှေးဟောင်းနယ်မြေထဲကတူးဖော်တွေ့ရှိရတဲ့ ရွှေလက်ကောက်(၁၀)ကွင်း၊ရွှေလုံးနှစ်ခု၊ ရွှေဘယက်အချို့ကိုတရားမဝင်ရောင်းစားသူတွေကို အရေးယူလိုက်တယ်လို့သိရပါတယ်။
ပုဂံဒေသ၊မြင်းကပါကျေးရွာ ပုဂံရှေးဟောင်းနယ်မြေထဲမှာ ရေစီးရေလာကောင်းမွန်ဖို့ မြောင်းတူးရာမှ ရှေးဟောင်းမြေအိုးတစ်လုံးတွေ့ရှိခဲ့ပြီး မြေအိုးထဲမှ ရွှေလက်ကောက်(၁၀)ကွင်း၊ရွှေလုံးနှစ်ခု၊ ရွှေဘယက်အချို့ကိုတွေ့ရှိခဲ့ရတာဖြစ်ပြီး သက်ဆိုင်ရာကိုမအပ်နှံဘဲ ကိုယ်ကျိုးအတွက် ထုခွဲရောင်းစား လိုက်တယ်လို့ ဖော်ပြထားပါတယ်။
တရားခံတွေက ပုဂံရှေးဟောင်းရွှေထည်ပစ္စည်းအချို့ကိုသိန်းပေါင်း(၁၄၈၀)ဖြင့်ရောင်းချခဲ့ပြီး သက်သေခံပစ္စည်းတွေအနေနဲ့ ရွှေခဲသုံးခု၊ရွှေထည်ပစ္စည်းမျိုးစုံ၊လေးကျပ်(၁၀)ပဲသုံးရွေးနဲ့ ရွှေထည်ပစ္စည်းအပိုင်းအစ(၁၆)ခု၊(၁၃)ကျပ်၊(၆)ပဲ၊နှစ်ရွေးတို့ကိုဖော်ထုတ်သိမ်းဆည်းမိခဲ့ပါတယ်။
ရှေးဟောင်းပစ္စည်းတွေကို သတင်းပေးပို့အပ်နှံခြင်းမရှိဘဲကိုယ်ကျိုးအတွက်အသုံးပြုခဲ့တဲ့ အောင်ဖြိုး၊ စိန်ထွန်း၊အောင်မိုးတို့သုံးဦးကိုဖမ်းဆီးအရေးယူထားပြီး ကျန်ရှိနေတဲ့ ဦးညို(ခေါ်)ကိုညိုပါ(၁၁)ဦးတို့ကို ဥပဒေနဲ့အညီထိရောက်စွာအရေးယူဖို့ဆောင်ရွက်နေတယ်လို့ သိရပါတယ်။
T