တာချီလိတ်မှာ အွန်လိုင်းလောင်းကစားနေရာကနေ ဖမ်းဆီးခဲ့တဲ့လူငယ်တွေကို အာမခံနဲ့ ပြန်လွှတ်

ရှမ်းပြည်နယ်၊ တာချီလိတ်မြို့နယ်မှာ ဖေဖေါ်ဝါရီလ နောက်ဆုံးအပတ်အတွင်း အွန်လိုင်းလောင်းကစားလုပ်ငန်းကနေ ဖမ်းမိထားသူတွေကို ဒီနေ့ မနက်ပိုင်းက စတင်ပြီး အာမခံနဲ့ ပြန်လွှတ်ပေးနေပြီလို့ သိရပါတယ်။

ပြန်လွှတ်ပေးရာမှာ သက်ဆိုင်ရာ ရပ်ကွက်ထောက်ခံစာ၊ မှတ်ပုံတင် မိတ္ထူနဲ့အတူ သန်းခေါင်စာရင်းရှိသူ ၂ ဦးရဲ့အာမခံထောက်ခံစာနဲ့အတူ ခံဝန်ချက်လက်မှတ်ရေးထိုးစေပြီး လွှတ်ပေးခဲ့တာဖြစ်ပါတယ်။

ဖမ်းဆီးထားတဲ့ လူအရေအတွက် (၆၉၇)ဦးမှာ မြန်မာလူငယ် (၄၈၄)ယောက်၊ ထိုင်းနိုင်ငံသား (၁၅၄)ယောက်နဲ့ တရုတ်နိုင်ငံသား (၁)ယောက်တို့ ပါဝင်ပြီး ပထမအသုတ်အဖြစ် (၁၈)နှစ်အောက် ကလေးငယ်(၅၈)ဦးကို မတ်လ (၈)ရက်နေ့က ပြန်လွှတ်ပေးလိုက်ကာ အခုလွှတ်ပေးခြင်းက ဒုတိယအကြိမ်ဖြစ်တယ်လို့ ဆိုပါတယ်။

လွတ်မြောက်ဖို့ ကျန်ရှိနေသေးတဲ့ ထိုင်းနိုင်ငံသားများတွေကို လဝက,က စစ်ဆေးပြီးရင်တော့ ထိုင်းဘက်ကို တရားဝင်လွှဲပြောင်းပေးသွားမယ်လို့ သတင်းကြားသိရပါတယ်။