တရုတ်-မြန်မာနယ်စပ်ဖြတ်ကျော် မဟာဓာတ်အားလိုင်းစီမံကိန်း ပထမအဆင့်ကို မကြာခင်မှာ စတင်တော့မယ်

ရှမ်းပြည်နယ်(မြောက်ပိုင်း)၊ မူဆယ်မြို့နယ်ထဲမှာ Chinese Working Group (CWG) က အကောင်အထည်ဖော် ဆောင်ရွက်မယ့် တရုတ်-မြန်မာနယ်စပ်ဖြတ်ကျော် မဟာဓာတ်အားလိုင်းစီမံကိန်း ပထမအဆင့်ကို မကြာခင်မှာပဲ စတင်အကောင်အထည်ဖော်တော့မယ်လို့ သိရပါတယ်။

စီမံကိန်း ပထမအဆင့်အဖြစ် တရုတ်နိုင်ငံ ယူနန်ဒေသကနေ ၁၀၀ မဂ္ဂါဝပ် လျှပ်စစ်ဓာတ်အားကို ၂၃၀ ကေဗွီ မဟာဓာတ်အားလိုင်းနဲ့ သွယ်တန်းသွားမှာဖြစ်ပြီး မဟာဓာတ်အားလိုင်းရဲ့အရှည်က ၃၉.၆ ကီလိုမီတာရှိမှာဖြစ်ပါတယ်။

မဟာဓာတ်အားလိုင်းရဲ့အရှည်က ၃၉.၆ ကီလိုမီတာက တရုတ်ဘက်ခြမ်းမှာ ၁၀.၆ ကီလိုမီတာ၊ မြန်မာဘက်ခြမ်းမှာ ၂၉ ကီလိုမီတာရှိမှာဖြစ်တယ်လို့ ဆိုပါတယ်။

အဲဒီစီမံကိန်းအတွက် ကနဦးပတ်ဝန်းကျင်ဆန်းစစ်ခြင်း (IEE) အစီရင်ခံစာကို သယံဇာတနဲ့ သဘာဝပတ်ဝန်းကျင်ထိန်းသိမ်းရေးဝန်ကြီးဌာနက သက်သေခံလက်မှတ် ECC ထုတ်ပေးထားပြီး ECC သက်တမ်းကို ၅ နှစ် သတ်မှတ်ပေးထားကာ ၂၀၂၉ ခုနှစ် ဇန်နဝါရီ ၁၇ ရက်နေ့ကိုရောက်မှ သက်တမ်းကုန်ဆုံးမှာဖြစ်ပါတယ်။

တရုတ်-မြန်မာနယ်စပ်ဖြတ်ကျော် ဓာတ်အားလိုင်းစီမံကိန်းက တရုတ်-မြန်မာစီးပွားရေးစင်္ကြံရဲ့အစိတ်အပိုင်းတစ်ခုဖြစ်ပြီး လျှပ်စစ်ဓာတ်အားပြတ်တောက်မှုပြဿနာကို ဖြေရှင်းနိုင်ဖို့ အဖြေတစ်ခု ဖြစ်လာမယ်လို့ သတင်းကြားသိရပါတယ်။