ကျားဖြန့် တရုတ်နိုင်ငံသား (၂၀၀) ဦးကို ထိုင်းမှတစ်ဆင့်တရုတ်သို့လွှဲပြောင်းပေးအပ်

————————————————————————————

၂၀၂၅ခုနှစ်၊ဖေဖော်ဝါရီလ၊(၂၁)ရက်

မြဝတီမှာကျားဖြန့်လိမ်လည်မှုလုပ်ငန်းတွေပါဝင်ခဲ့ကြတဲ့တရုတ်နိုင်ငံသား(၂၀၀)ဦးကို မြန်မာ-ထိုင်း-တရုတ်ပူးပေါင်းကာစုံစမ်းဖော်ထုတ်ခဲ့ပြီး သက်ဆိုင်ရာနိုင်ငံသို့ လွှဲပြောင်း ပေးအပ်ခဲ့တယ်လို့ သိရပါတယ်။

မြန်မာနိုင်ငံအတွင်းသို့ နယ်စပ်လမ်းကြောင်းများမှတစ်ဆင့် တရားမဝင်ဝင်ရောက် နေထိုင်ပြီး ကရင်ပြည်နယ် မြဝတီမြို့-ရွှေကုက္ကိုလ်နဲ့ KK Park နယ်မြေတွေမှာတရား မဝင် Online လောင်းကစားမှုများ၊ Online လိမ်လည်မှုတွေနဲ့ ဒုစရိုက်မှုတွေလုပ် ဆောင်ခဲ့ကြတဲ့ တရုတ်နိုင်ငံသား(၂၀၀)ဦးကို လွှဲပြောင်းပေးအပ်တာဖြစ်ပါတယ်။

အဲဒီလိုလွှဲပြောင်းပေးအပ်ရာမှာ လူသားချင်းစာနာ ထောက်ထားမှုနဲ့ နိုင်ငံအချင်းချင်း ချစ်ကြည်ရင်းနှီးမှုတို့ကို ရှေးရှုပြီး ဖေဖော်ဝါရီလ(၂၀) ရက်မှာ ထိုင်းနိုင်ငံမှတစ်ဆင့် သက်ဆိုင်ရာနိုင်ငံသို့ ဥပဒေလုပ်ထုံး လုပ်နည်းတွေနဲ့အညီ စနစ်တကျလွှဲပြောင်း ပေးအပ်ခဲ့တယ်လို့ ဖော်ပြထားပါတယ်။

အခုလွှဲပြောင်းပေးခဲ့တဲ့ တရုတ်နိုင်ငံသားတွေကို ထိုင်းနိုင်ငံမဲဆောက် လေဆိပ်မှ တစ်ဆင့် တရုတ်နိုင်ငံသို့ ဆက်လက်ပို့ဆောင်ရာ ထိုင်းနိုင်ငံဒုတိယဝန်ကြီး ချုပ်နှင့် ကာကွယ်ရေးဝန်ကြီး H. E. Mr. Phumtham Wechayachai ၊ တရုတ်နိုင်ငံ တရုတ် ပြည်သူ့လုံခြုံရေးဆိုင်ရာဝန်ကြီးဌာန လက်ထောက်ဝန်ကြီး H. E. Mr. Liu Zhong Yiနဲ့ မြန်မာနိုင်ငံအတွင်း တရားမဝင် ဝင်ရောက်လာတဲ့နိုင်ငံခြားသားများအား ဥပဒေနဲ့အညီ အမြန်ဆုံးအရေးယူပြည်နှင်လွှဲပြောင်းမှု ကြီးကြပ်ရေး ဗဟိုကော်မတီ အဖွဲ့ဝင် ပြည်ထဲ ရေးဝန်ကြီးဌာန ဒုတိယဝန်ကြီး ဗိုလ်ချုပ်အောင် ကျော်ကျော်တို့ဟာ စနစ်တကျဖြစ်စေ ရေးကြည့်ရှုကြပြီး မီဒီယာတွေ နဲ့တွေ့ဆုံကာ လွှဲပြောင်းလက်ခံရေးဆိုင်ရာကိစ္စရပ် တွေနဲ့စပ်လျဉ်းပြီး ရှင်းလင်းပြောကြားခဲ့တယ်လို့ သိရပါတယ်။

#Mercury

#Mercury News

#ကျားဖြန့်

#တရုတ်နိုင်ငံသား