ကလောမြို့မှာ သေဆုံးထားတဲ့ရုပ်အလောင်း ၁၀၀ကျော် တွေ့ရှိထားပြီး လူ ၂၀၀ကျော်ပျောက်ဆုံးနေ

၂၀၂၄၊စက်တင်ဘာလ၊၁၄ရက်

ရှမ်းပြည်နယ်တောင်ပိုင်း၊ ကလောမြို့ မှာ ရေကြီးပြီး မြေပြိုတာတွေကြောင့် သေဆုံးထားတဲ့ရုပ်အလောင်း ၁၀၀ ကျော်ရှိနေပြီး လူ ၂၀၀ ကျော် ပျောက်ဆုံးနေတယ်လို့ သိရပါတယ်။

ရရှိထားတဲ့ရုပ်အလောင်းတွေထဲမှာ လသားအရွယ်ကလေးငယ်တွေနဲ့သက်ကြီးရွယ်အို တွေရဲ့ ရုပ်အလောင်းတွေလည်းပါဝင်ပြီး ရပ်ကွက် (၂)၊ (၃) နဲ့ (၄) နေရာတွေမှာ ဆိုးဆိုးဝါးဝါး ရေကြီးမြေပြိုမှုတွေဖြစ်ပေါ်ခဲ့တာဖြစ်ပါတယ်။

‘ကလောတစ်မြို့လုံးနီးပါးပျက်စီးပါတယ်။ကျွန်တော်ဆိုင်တွေလည်းပျက်စီးသွားပါတယ်။မိသားစုကတော့အသက်အန္တရာယ်ကင်းပါတယ်။ဆုံးရှုံးသွားတာကတော့တော်တော်များတယ်။လူအသေအပျောက်ကတော့ရာကျော်တယ်” လို့ဒေသခံတစ်ဦးကပြောပါတယ်။

လက်ရှိအချိန်မှာတော့ ရေပြန်ကျသွားပြီဖြစ်ပြီး ရှင်းလင်းရေးနဲ့ ပြန်လည်ထူထောင်ရေးကို လုပ်ဆောင်နေတယ်လို့လည်း ကလောမြို့ခံတွေဆီက သိရပါတယ်။