ကမ္ဘာ့ကျန်းမာရေးအဖွဲ့(WHO)ကနေ အာဂျင်တီးနား နုတ်ထွက်မည်

၂၀၂၅၊ဖေဖော်ဝါရီလ၊၆ရက်

အာဂျင်တီးနားနိုင်ငံကလည်း ပြီးခဲ့တဲ့လက အမေရိကန်သမ္မတ ဒေါ်နယ်ထရန့်ရဲ့ အလားတူ လုပ်ရပ်လို ကမ္ဘာ့ကျန်းမာရေးအဖွဲ့(WHO)ကနေ နုတ်ထွက်မယ်လို့ ကြေညာလိုက်ပါတယ်။

အာဂျင်တီးနားသမ္မတကိုယ်တိုင်က ကမ္ဘာ့ကျန်းမာရေးအဖွဲ့(WHO)ကနေ နုတ်ထွက်မယ့် ညွန်ကြားချက်ကို ပေးခဲ့တာဖြစ်တယ်လို့လည်း သမ္မတ၏ပြောရေးဆိုခွင့်ရှိသူ Manuel Adorni ကဗုဒ္ဓဟူးနေ့သတင်းစာရှင်းလင်းပွဲမှာ ပြောခဲ့တာဖြစ်ပါတယ်။

အာဂျင်တီးနားရဲ့ အချုပ်အခြာ အာဏာကို နိုင်ငံတကာအဖွဲ့အစည်း တစ်ခုခုက ဝင်ရောက်စွက်ဖက်တာမျိုးကို အာဂျင်တီနားလူမျိုးတွေက ခွင့်ပြုမှာမဟုတ်ဘဲ WHOဆီကနေ ကျန်းမာရေးအထောက်အပံ့ရနေတာကလည်း အရမ်းနည်းနေတယ်လို့ သူက ထပ်ပြောခဲ့ပါတယ်။

အာဂျင်တီးနားသမ္မတရုံးရဲ့ နောက်ဆုံးထုတ်ပြန်ချက်မှာတော့ WHOတာဝန်ရှိသူတွေ ဟာ Covid-19 ကပ်ရောဂါကာလအတွင်းမှာ အဆုံးမရှိတဲ့ quarantineကာလတွေနဲ့ အဖွဲ့အစည်းရဲ့ စီးပွားရေးကို ထိခိုက်မှုတွေ ဖြစ်စေခဲ့တယ်လို့ ပြောထားပါတယ်။

“နိုင်ငံတကာ အသိုက်အဝန်းက ဖွဲ့စည်းတည်ထောင်ထားပြီး ရည်ရွယ်ချက်တွေနဲ့ မကိုက်ညီတဲ့ supranational အဖွဲ့အစည်းတွေ ဘာကြောင့် တည်ရှိနေရတာလဲ၊နိုင်ငံတကာ အသိုင်းအဝန်းကနေ ပြန်လည်စဉ်းစားဖို့ အရေးကြီးပါတယ်” လို့လည်း ထုတ်ပြန်ချက်ပါတယ်။

နိုင်ငံတကာလေ့လာသုံးသပ်သူတွေကတော့ အမေရိကန်၊အာဂျင်တီးနားတို့ရဲ့ ဆုံးဖြတ်ချက်ဟာ အစွန်းရောက် အမျိုးသားရေးဝါဒသာဖြစ်ပြီး နိုင်ငံတကာအဖွဲ့အစည်းတွေအနေနဲ့ အရေးယူတာတွေ ပြုလုပ်ဖို့ ပြောနေကြပါတယ်။

ဓါတ်ပုံ-CNN